ទណ្ឌកម្មស្នេហ៍

-ឈរប្របមាត់បឹង សម្លឹងទឹកហូរ
ទឹកភ្នែកជន់ជោរ ស្រក់ហូរឥតល្ហែ
សែនស្ដាយស្រណោះ ចិត្តស្មោះបងថែ
មិនគួរបែកបែរ ចោលស្នេហ៍ថ្លើមថ្លៃ។
-រឿងរ៉ាវជីវិត រួបរឹតបញ្ហា
នឹកឃើញម្ដងណា ខ្លោចផ្សាពេកក្រៃ
សឹងតែលែងនៅ ចេញទៅឲ្យឆ្ងាយ
ក្រែងបានរសាយ ខ្វល់ខ្វាយគំនិត។
-ឱ! ស្ពានមានជ័យ ក្រុងសែនមនោរម្យ
កុំសើច កុំយំ រឿងខ្ញុំខូចចិត្ត
ប្រាសព្រាត់មាសឆ្អិន ម្ដាយមិនអាណិត
ឃើញប្រុស ក្រ ពិត ឥតត្រាប្រណី។
-បងអើយ អូនគ្មានបំណងបែកទេ!
ដួងចិត្តនៅតែ ពុំប្រែសម្ដី
សម្បថលើភ្នំ យាយផ្លុំសក្ខី
អស់ពៀរអប្រិយ វិលវៃរកបង...។/
និពន្ធដោយ៖ ផែន សុផល