បេះដូងឈឺផ្សា

-ខ្យល់បក់វូៗ យោលយោគមែកជ្រៃ
ពពូលយំភ័យ ហើរចោលទ្រនំ
ផ្ទៃមេឃស្រឡះ ច័ន្ទរះពេញវង់
អនិច្ចា អើយ ខ្ញុំ ទុក្ខធំព្រោះស្នេហ៍។
-អង្គុយម្នាក់ឯង ចិត្តរែងក្រៀមក្រោះ
កើតក្ដីស្រណោះ ស្រណោកម្ល៉េះទេ!!
ស្ដាយវ័យក្រមុំ ខំរក្សាថែ
លួចក្បត់ឪម៉ែ ចាកប្រពៃណី។
-ស្បថស្បែរយដង បងពោលមុខអូន
ភក្ដីនឹមនួន លុះសូន្យជីវី
អាណិតស្រលាញ់គិតគ្រប់នាទី
ប្រុសឆោមឆវីគូព្រេងវាសនា។
-ម្ដេចឡើយពេលនេះ ស្នេហ៍ប្រែជូរចត់
ពាក្យពេចន៍សម្បថឱ្យអូនឈឺផ្សា
បងមានអ្នកថ្មី បំភ្លេចសន្យា
បេះដូងឯកា លើស្នេហាកម្ម។/
និពន្ធដោយៈ ផែន សុផល