ភូមិបេងជម្រកស្នេហ៍

- នឹកដល់ភូមិបេង ភូមិកំណើតខ្ញុំ
ទីស្ថានសុខុម កាលនៅកុមារ
នឹកឪ នឹកម៉ែ កេរទ្រព្យដូនតា
នឹកអនុស្សារ ទុក្ខឥតពេលស្បើយ។
- ស្រណោះទឹកព្រែក ធ្លាប់ងូតឃ្វាលគោ
ស្រណោះម្លប់ពោធិ៍ខ្យល់រំភើយ
បឹងរាំង កកោរ ខ្នងជ្រុងកែវអើយ...
កន្លែងកៀកកើយ បងហើយនិងស្រី។
- វត្តក្រពុំឈូក បុណ្យចុះសីមា
ស្ដាប់លោកទេសនា ប្រណិប័តន៍ឃ្មាតខ្មី
តាមពុទ្ធឱវាទ មាគ៌ាប្រពៃ
ចាស់ទុំប្រុសស្រីមូលមីរជួបជុំ។
- ទោះបីឃ្លាតកាយ តែចិត្តនៅចាំ
ឃ្លាតឆ្ងាយច្រើនឆ្នាំ នឹកដល់ទ្រនំ
ភូមិបេងជម្រកស្នេហ៍ ដ៏ឧត្តម
រូបខ្ញុំក្រៀមក្រំ នឹកឥតរសាយ។/
និពន្ធដោយៈ ផែន សុផល