ស្រណោះស្នេហ៍កុលាបជ្រៃសែន

- ថ្ងៃលិចក្រោយផ្ទះ ចាំងជះពន្លឺ
រស្មីផ្លេកភ្លឺ ពណ៌ក្រហមឆ្អិន
រុក្ខជាតិឆេះខ្លោច កំឡោចឈួលក្លិន
បងឈរសុបិន ស្រណោះក្លិនស្នេហ៍ ។
- យប់នេះ បងត្រូវយំសារជាថ្មី
ព្រោះតែរូបស្រី ផ្លាស់ចិត្តប្រួលប្រែ
ភ្លេងការល្វើយៗ កើតទុក្ខម្ល៉េះទេ!!!
ខ្ញុំយំគ្មានល្ហែ ស្ដាយគូសង្សារ ។
- ឱ! ភូមិជ្រៃសែន បងណែនទ្រូងណាស់
អូនអើយ ប្រុសខ្មាសញាតិធ្លាប់ចរចា
ផ្គូផ្គងបង្អាប់ ចាប់ជល់ស្នេហា
ខ្មាសមិត្តសាលា រៀនវិទ្យាល័យ ។
- បងយំសោកស្ដាយ នឿយណាយដួងចិត្ត
ឆ្អែតឆ្អន់ជីវិត ស្នេហ៍បរាជ័យ
មួយលើក ពីរលើក ខកចិត្តត្បិតស្រី
ចង់តែក្សិណក្ស័យ ឱ្យផុតចម្បែង ។/
និពន្ធដោយៈ ផែន សុផល