ជាប់ចិត្តក្រុងសែនមនោរម្យ

-ចុះពីរថយន្ដ គយគន់ទេសភាព
ក្រោមថ្ងៃទន់ទាប រៀបអស្ដង្គត់
រស្មីចាំងច្រាល ផ្ដើមសាយរលត់
អារម្មណ៍ស្រយុត រែងស្លុតចិន្ដា។
-ក្រុងសែនមនោរម្យ វាលធំអន្លាយ
មើលទៅរីករាយ ស្បើយពីទុក្ខា
វាលស្មៅខៀវខ្ចី ព្រឹក្សព្រៃពណ៌ផ្កា
ជ្រលងបព្វតា ស្រណោះពេកក្រៃ។
-វង្វង់គោព្រៃ ស្គាល់កែវវរមិត្រ
កវីចាប់ចិត្ត ជាប់ស្អិតនិស្ស័យ
កុលាបសែនស្រស់ ទើបតែពេញវ័យ
បង្ហាញរូបកាយ ក្បែរសាលារៀន។
-បើមានព្រេងបុណ្យ កុសលពិតនោះ
សូមជួយសន្ដោស ប្រោសព្រំប្រទាន
ឱ្យបានជួបស្រី ជាគូឆ្លងស្ពាន
ឆ្ពោះទៅវិមាន សុខសាន្ដរៀងអើយ..។/
និពន្ធដោយៈ ផែន សុផល