តាកែវ មាត់ស្ទឹងស្នេហា

-តាកែវ តាកែវ មាត់ស្ទឹងស្នេហា
ក្រោមដួងចន្ទ្រថ្លា តារារះឆ្ងាយ
ឯធាតុអាកាស ស្រឡះរីករាយ
ជំនោរពីអាយ សាយក្លិនបទុម។
-អូនកើយភ្លៅបង លើបង់មាត់ស្ទឹង
ហត្ថាព្រលឹង ប្រលោមបីបម
នាសាផ្ដេកផ្តិត ស្រូបក្លិនថ្ពាល់មុំ
សម្ដីប្រុសសុំ សេចក្ដីស្នេហ៍ពិត។
-បួនឆ្នាំ បងផ្ដាំ រៀនចប់បរិញ្ញា!
នឹងឱ្យមេបា ចូលស្ដីវរមិត្រ
អូនអររំជើប រំភើបក្នុងចិត្ត
រួមរស់កៀកកិត នែបនិត្យមេត្រី។
-បងអើយ...បើបាន ស្គាល់ប្រាណនួនល្អង
សូមកុំបែរខ្នង ដោះដៃចោលស្រី
អូនស៊ូលំបាក រង់ចាំថ្លើមថ្លៃ
បំពេញនិស្ស័យ ជាគូជីវិត...។/
និពន្ធដោយៈ ផែន សុផល