Thursday, October 17, 2013

បុប្ផា នៃភូមិតាតឹម

-ឱបដៃមាត់ទឹក ឈរភ្លឹកញញឹម
លួចនឹកសង្ឃឹម ជួបស្នេហ៍ថ្មោងថ្មី
បុប្ផាមួយទង ចងចិត្តកវី
បុណ្យព្រេងនិស្ស័យ បានស្គាល់ជីវា។
-ឱ! ភូមិតាតឹម ខ្ញុំចាំមិនភ្លេច
ចាំជាប់ជានិច្ច នៅក្នុងចិន្ដា
មាណវីស្រុកស្រែ គួរឱ្យស្នេហា
ឫកពារកិរិយា សែនសមល្អគន់។
-ខ្យល់អើយ..នាំផ្លូវ បក់ទៅប្រាប់ស្រី
ពាក្យពេចន៍កវី ឱ្យថ្លៃដឹងមុន
ថាប្រុសស្ម័គ្រស្មោះ ឥតមានទ្រព្យធន
គាប់ចិត្តតូចតន់ ទេណានួនល្អង។
-ក្នុងមួយជាតិនេះ រៀមទើបតែយល់
អ្វីដែលស្រីផ្ដល់ ចំពោះរូបបង
ក្ដីស្នេហ៍បរិសុទ្ធ ចេញពីដើមទ្រូង
ភាសាបេះដូង ឱ្យបងស្លាប់ចិត្ត...។/
និពន្ធដោយៈ ផែន សុផល

No comments:

Post a Comment